جنرل سید عاصم منیر 29 نومبر کو بطور 17 ویں آرمی چیف کمانڈ سنبھالیں گے

اسلام آباد:جنرل عاصم منیر کی بطور آرمی چیف 3 سال کے لیے تقرری کا نوٹیفکیشن جاری کر دیا گیا۔حکومت کی جانب سے جنرل ساحر شمشاد مرزا کی بطور چیئرمین جوائنٹ چیفس آف اسٹاف کمیٹی 3 سال کے لیے تعیناتی کا نوٹیفکیشن بھی جاری کیا گیا ہے۔موجودہ چیئرمین جوائنٹ چیفس آف اسٹاف کمیٹی جنرل ندیم رضا کی 27 نومبر اور آرمی چیف جنرل قمرجاوید باجوہ کی 29 نومبر کو ریٹائرمنٹ کا نوٹیفکیشن بھی جاری کیا گیا ہے۔جنرل سید عاصم منیر 29 نومبر کو بطور 17 ویں آرمی چیف کمانڈ سنبھالیں گے۔

جنرل ساحر شمشاد مرزا 27 نومبر کو بطور چیئرمین جوائنٹ چیفس آف سٹاف کمیٹی کمانڈ سنبھالیں گے۔جنرل عاصم منیر نئے آرمی چیف اور جنرل ساحر شمشاد مرزا چیئرمین جوائنٹ چیفس آف اسٹاف کمیٹی تعینات کر دیے گئے ہیں۔وزیرِ اعظم شہباز شریف کی سمری پر صدرِ مملکت ڈاکٹر عارف علوی نے تقرریوں کی منظوری دے دی۔صدرِ مملکت ڈاکٹر عارف علوی اور وزیرِ اعظم شہباز شریف سے نئے آرمی چیف اور چیئرمین جوائنٹ چیفس آف اسٹاف کمیٹی نے علیحدہ علیحدہ ملاقاتیں بھی کیں۔

جنرل عاصم منیر اعزازی شمشیر یافتہ، ڈی جی ملٹری انٹیلی جنس، آئی ایس آئی کے سربراہ، کور کمانڈر گوجرانوالہ رہ چکے ہیں۔وہ اکتوبر2021ء سے جی ایچ کیو میں کوارٹر ماسٹر جنرل کے فرائض سر انجام دے رہے تھے۔نئے آرمی چیف جنرل عاصم منیر مثالی یادداشت کے حامل اور حافظِ قرآن بھی ہیں۔انہوں نے بطور لیفٹیننٹ کرنل مدینہ منورہ میں تعیناتی کے دوران اپنے شوق کے باعث 38 سال کی عمر میں حفظِ قرآن کی سعادت حاصل کی۔جنرل ساحر شمشاد مرزا نے اپنے فوجی کیریئر کا آغاز 8 سندھ رجمنٹ سے کیا اور وہ پی ایم اے سے تربیت مکمل کر کے پاک فوج میں شامل ہوئے جبکہ فور اسٹار جنرلز کی تعیناتی کی سنیارٹی لسٹ میں جنرل ساحر دوسرے نمبر پر تھے۔

جنرل ساحر شمشاد مرزا ستمبر 2021ء سے کور کمانڈر راولپنڈی ہیں، وہ جون 2019ء میں چیف آف جنرل اسٹاف کے عہدے پر فائز ہوئے جبکہ مختصر مدت کے لیے ایڈجوٹنٹ جنرل جی ایچ کیو بھی رہے۔جنرل ساحر شمشاد مرزا اکتوبر 2018ء میں وائس چیف آف جنرل اسٹاف تعینات ہوئے، انہوں نے 2015ء تا 2018ء بطور ڈی جی ملٹری آپریشنز خدمات انجام دیں۔ہیجان ختم، جنرل عاصم منیر نئے آرمی چیف، جنرل ساحر شمشاد مرزا چیئرمین جوائنٹ چیفس آف اسٹاف تعینات، وزیراعظم کی سمری پر صدر عارف علوی نے تقرریوں کی منظوری دیساحر شمشاد مرزا نے بطورلیفٹیننٹ کرنل، بریگیڈیئراور میجر جنرل ملٹری آپریشنز ڈائریکٹوریٹ میں خدمات انجام دیں۔

جنرل ساحر شمشاد مرزا نے ٹی ٹی پی اور دیگر دہشت گرد گروپوں کے خلاف آپریشنز سپروائز کیے اور وہ انٹرا افغان ڈائیلاگ میں بھی متحرک کردار ادا کرتے رہے۔جنرل ساحر شمشاد مرزا گلگت بلتستان اصلاحات کمیٹی کا بھی حصہ رہے، انہوں نے جی او سی 40 انفینٹری ڈویژن اوکاڑہ میں بھی خدمات انجام دیں، وہ سابق آرمی چیف جنرل (ر) راحیل شریف کے دور میں ڈائریکٹر جنرل ملٹری آپریشنز رہے، 10 کور راولپنڈی کے کور کمانڈر کے طور پر بھی ان کی خدمات ہیں۔